കുറഞ്ഞ പ്രീമിയം നിരക്കുകളാണ് ഉപഭോക്താക്കളെ ഓണ്ലൈന് ഇന്ഷുറന്സിലേക്ക് ആകര്ഷിക്കുന്നത്. കുറഞ്ഞ വിലയ്ക്ക് പിന്നില് വല്ല 'കുടുക്കും' ഉണ്ടോ? ക്ലെയിം ചെയ്യുന്നതിന് സഹായം ലഭ്യമാകുമോ? ഇന്ഷുറന്സ് വിപണിയിലെ ഈ വില വ്യത്യാസത്തിന് പിന്നിലെ കാരണമെന്ത്?
ഇന്ഷുറന്സ് കമ്പനികള് ഏജന്റുമാര്ക്കോ ബ്രോക്കര്മാര്ക്കോ നല്കേണ്ടി വരുന്ന കമ്മീഷന് തുക ഒഴിവാകുന്നതാണ് ഓണ്ലൈന് പോളിസികള്ക്ക് വില കുറയാനുള്ള പ്രധാന കാരണം. ഈ ലാഭം കമ്പനികള് ഉപഭോക്താക്കള്ക്ക് ഡിസ്കൗണ്ടായി നല്കുന്നു. കൂടാതെ പോളിസി ഇഷ്യൂ ചെയ്യുന്നതിനും മറ്റുമുള്ള ഭരണപരമായ ചെലവുകളും ഓണ്ലൈന് പ്ലാറ്റ്ഫോമുകളില് കുറവായിരിക്കും. ഏജന്റ് വഴിയോ ബ്രോക്കര് വഴിയോ ഇന്ഷുറന്സ് എടുക്കുമ്പോള് വിലയില് മാറ്റം കാണാറില്ല. കാരണം, നിയമപ്രകാരം ഒരേ പോളിസിക്ക് എല്ലാ വിതരണക്കാര്ക്കും ഒരേ നിരക്ക് തന്നെയായിരിക്കണമെന്ന് ഇന്ഷുറന്സ് കമ്പനികള്ക്ക് നിര്ദ്ദേശമുണ്ട്.
ഓണ്ലൈന് ഇന്ഷുറന്സ് എടുത്തവര്ക്ക് ക്ലെയിം സഹായം ലഭ്യമാകുമോ?
നേരിട്ട് വാങ്ങുമ്പോള് ലഭിക്കുന്ന പല സേവനങ്ങളും ഓണ്ലൈന് പോളിസികളില് നമുക്ക് നഷ്ടമായേക്കാം. ആശുപത്രിയില് പ്രവേശിപ്പിക്കപ്പെടുമ്പോഴോ ക്ലെയിം നിരസിക്കപ്പെടുമ്പോഴോ ഒരു ഏജന്റിന്റെ സഹായം വളരെ വലുതാണ്. ഓണ്ലൈന് പോളിസികളില് ഉപഭോക്താവ് തന്നെ നേരിട്ട് കമ്പനിയുമായി ആശയവിനിമയം നടത്തേണ്ടി വരുന്നു. ഇത് പലപ്പോഴും പ്രായോഗികമായ ബുദ്ധിമുട്ടുകള് ഉണ്ടാക്കുന്നു. മാത്രമല്ല, ഓരോ വ്യക്തിക്കും ആവശ്യങ്ങള്ക്കനുസരിച്ച് ഏത് പോളിസി തിരഞ്ഞെടുക്കണം എന്ന് നിര്ദ്ദേശിക്കാന് പരിചയസമ്പന്നരായ ഇടനിലക്കാര്ക്ക് സാധിക്കും. ഓണ്ലൈന് ഇന്ഷുറന്സില് ഇത്തരം വിദഗ്ധോപദേശം ലഭിക്കില്ല.
മാത്രമല്ല, പോളിസി സര്വീസിങ് ഒന്നും തന്നെ ഓണ്ലൈനില് ലഭ്യമാകില്ല. വിലാസം മാറ്റുകയോ ഗുണഭോക്താക്കളെ ചേര്ക്കുകയോ പോലുള്ള സേവനങ്ങള്ക്ക് ഏജന്റിന്റെ സഹായം ലഭ്യമാകാതെ വരും. ഇന്ഷുറന്സ് കാര്യങ്ങളില് അറിവുള്ളവര്ക്കും ക്ലെയിം നടപടികള് സ്വന്തമായി ചെയ്യാന് സാധിക്കുന്നവര്ക്കും ഓണ്ലൈന് പോളിസികള് ലാഭകരമാണ്. ഇത് പണം ലാഭിക്കാന് സഹായിക്കും.
എന്നാല് സങ്കീര്ണമായ ഘട്ടങ്ങളില് സഹായം ആഗ്രഹിക്കുന്നവര്ക്ക് ഒരു ഏജന്റ് വഴിയുള്ള പോളിസി എടുക്കുന്നതാവും കൂടുതല് സുരക്ഷിതം. ഏജന്റിന് നല്കുന്ന അധിക തുക ക്ലെയിം സമയത്ത് ലഭിക്കുന്ന വലിയൊരു കൈത്താങ്ങായി മാറും.
Content Highlights: Are you planning to purchase a health insurance policy online?here are the important things you should know